Rev 8 | DOB | STEP | 'Enega lami nina losipwa esebenina 'ili'amina, ga nigeya 'ebweu wate galewega ona nai galala simeema tuta kukupana namo 'enaya.

Revelation of John 8

Losipwa esebenina manuna

1 'Enega lami nina losipwa esebenina 'ili'amina, ga nigeya 'ebweu wate galewega ona nai galala simeema tuta kukupana namo 'enaya. 2 Ta muliyega anilose nidi sebeni Yaubada matanaya sitootoolo ya'itedi, ga Yaubada 'idi yoguli 'ebweuna 'ebweuna 'i'ebwa'edi.

3 Ta wate 'ebweu anilose ma ina gaeba goula 'imai, ga 'ebe taliya selabenaya 'itoolo. Ta 'ebe taliya nina nate Yaubada 'ina 'ebemi esaesa selabenaya. 'Enega Yaubada gaeba goula nina 'iloemaena gala'u 'enega, ga anilose nina 'i'ebwa'ena, 'enega anilose nina 'ebe taliya 'ena 'isa'una be 'igabu. 'Igabuna ga 'asuna ta maina bobo'ana be wate Yaubada 'ina tomotaiyao 'idi sidasidao situ'e leleleya galewaya.

4 'Enega gaeba nina magala'una 'isa'una Yaubada matanaya, ta sidasida gala'u 'asuna ma'iyana situ'etu'e, ga 'ana laba 'i'ala egumwalina. 5 'Enega anilose nina gaeba nina kakaena 'i'ewena, ga 'ebe taliya nina 'enega kaiwe 'ala'alasina 'i'ewena, ga 'enega gaeba nina 'iloemaena, ta 'iula ebusiyena bale'uya, ga gote 'ena namala be wepalala be 'aidi 'enana ta wate mwani'ini'i siapwesa.

Yoguli nidi simu'edi

6 'Enega anilose nidi sebeni 'idi yoguli nidi sigiyaidi sabi mu'edi.

7 Ta 'ebweu 'ina yoguli 'imu'ena ga 'usana 'ana 'ita dumadumana 'iebusi, 'ana 'ita aisi pulipulidi nadigega, ga wate kaiwe 'ala'alasina ta lala ma'edi sisagusaguma bale'uya, ga 'i'alasina. 'Eguma bale'u maibo'ana 'ana weyala 'etoi, 'ebweu sena 'i'alasi ta 'eluwa sena nigeya. Ta sena nina 'i'alasina 'enaya kaiwe be pwatula maibo'adi wate 'i'ala egumwalidi. 8 'Enega anilose 'eluwena 'ina yoguli 'imu'ena, ta 'ebweu yage 'ana 'ita 'atuwa nadigega 'oya sinabwana 'isabesabeluluma ga ni'uya siulena, 'enega ola 'ielala. 'Abo ola maibo'ana 'ana weyala 'etoi, ta 'ebweuna 'ediyega 'ielala, ta 'eluwa bobo'adi. 9 Ta ola nina 'ielala solanaya iyana maibo'adi simwawasa, ta waga maibo'adi 'enaya sieligeidi.

10 'Enega anilose 'etonina 'ina yoguli 'imu'ena, ta kwadima sinabwana 'i'ala'alata 'ana 'ita 'atuwa gudala galewega 'ibe'uma, ta bale'u nina 'ana weyala 'etoi ga 'ebweuna weyala nina 'ena kwadima 'ibe'u ga bwasinao sidalele. 11 Kwadima nina 'ana esana Dalele, ta tomota yaudi bwasi nidi daleledi 'ediyega sinuma ga simwawasa.

12 'Enega anilose eatana 'ina yoguli 'imu'ena ga sinala senana 'ebweu 'iguguyoi ta sena 'eluwa bobo'adi, ta wate nawalae senana 'ebweu 'iguguyoi ta sena 'eluwa bobo'adi, ta wate kwadimao 'abo taweyalidi sena 'etoi 'ediya, 'ebweu sena 'ana kwadimao siguguyoi, ta sena 'eluwa 'ediya simaemaedana. 'Enega 'asiyata maibo'ana 'ana weyalao 'etoi, 'ebweu tuta guguyoi, ta 'eluwa bobo'adi. Nadigega wate boiboi, 'ebweu tuta guguyoi, ta 'eluwa bobo'adi.

13 Ta yadunedune ga magisubu sinabwana 'itaetaeya galewaya ya'itena, ga 'enana sinabwana yanonona, 'igwae, “Oiyoi nuwa'ole'olemi, 'omi bale'u 'ana tomiyanao, manuna 'abo aniloseyao yoguli 'etoi simu'edi, mwau sinabwana 'iapwesama.” 11:14